Sa taong 2020, sa gitna ng pandemya, ginunita ang ikapitumpu’t limang taon ng pagtatapos ng Ikalawang Digmaang Pandaigdig. Sa nakaraang pitumpu’t limang taon, kakaunting pag-aaral ukol sa kultural na implikasyon ng pananakop ng Hapon sa Filipinas ang inilimbag. Sa mga saliksik na ito, tila sadyang nakaligtaan ang mahalagang papel ng musika bilang panghimok (propaganda music).

Ang tatlong dantaon ng pananakop ng Espanya at apat na dekada ng kolonisasyon ng Estados Unidos sa kapuluan ay nagdulot ng Hispanisasyon at Amerikanisasyon ng kamalayang Filipino. Maging ang pisikalidad ng maraming siyudad sa Filipinas ay itinatag gamit ang pundasyon ng mga impluwensiyang kolonyal. Sa mahigit tatlong taon ng pananakop ng Hapon sa Filipinas ay ipinilit ang parehong manipulasyon sa kamalayang Filipino. Aktibong iginiit ang pagtanggap ng Filipino sa kinasadlakang pananakop sa ilalim ng bandila ng Greater East Asia Co-Prosperity Sphere kung saan inilako rin ang mga kaisipang “Asya para sa Asyano” at “Filipinas para sa Filipino.”

Ang kasalukuyang aklat ay tumitingin sa pangkasaysayan at malawak na pangkultural na papel ng musika sa panahon ng pananakop ng Hapon sa Filipinas—mga musikang ipinakilala ng Hapon, partikular ang gunka o mga awit pandigma, mga makabayan at pambayang awit sa wikang Hapones, at mga musikang nilikha ng Filipino na sumusunod at nagtatahi sa naratibo at diskurso ng pananakop ng Hapon sa Filipinas.

Author: Raul Casantusan Navarro
ISBN/ISSN: 978971542935-1
Category: Social Science, Music, History
Copyright: 2021
Pages: 464pp
Size: 6x9
Type: PB/SP