Ang mga tula ay malikhaing pagsasaboses sa naging pag-uusisa ng makata sa kung bakit may mga pagkakataong tahimik ang bata. Ramdam ko na ang kinang sa mata ng mga batang mambabasa bilang pagsang-ayon sa mga tulang nagbibigay-tinig sa kanilang mga karanasang tinimpi ng pananahimik. Kakampi ng mga bata ang mga tulang ito, at iyon ang pinakamakapangyarihang ambag ni Alquisola sa kanyang koleksiyon.
Christine S. Bellen-Ang, PhD
Manunulat at Mandudula Para sa mga Bata Maraming gustong sabihin ang koleksiyon ng tulang Sa Tuwing Ikaw Ay Tahimik sa panulat ni Vijae Alquisola: ako ang batang nagpipigil ng ihi, ang batang sinlaki ni Santa Klaws, ang batang ikinahihiya ang baon, may ADHD, at ang batang binu-bully sa internet. Iba-iba ang mga tauhan, iba-iba ang danas pero halos iisa ang damdaming nangingibabaw. Ako ay bahagi ng minorya, may katangian o karanasang kaiba sa alam o nakasanayan ng nakararami. May mali ba sa akin?
Ang mga salita ni Vijae ay tumatagos sa pahina, yumayanig ng alaala, at kumukurot sa puso ng mga bata at pusong bata. Sa tulang “Kulas Kupas” mula sa koleksiyon, inilarawan ang pang-aasar: sana’y kumukupas kapag tumagal. Ang naisasawalang-bahala ng matatanda ay maaaring mabigat na isyu para sa mga bata. Hindi ba’t lahat tayo ay minsan nang nangarap na kumupas ang problemang hinaharap? Ganito ang mga tula ni Vijae. Iniimbitahan tayong kumustahin ang iba’t ibang batang Pilipino. At nagpapaalala—’ika nga sa tulang “Sa Tuwing Ikaw Ay Tahimik,” “kung ang hapon sa paarala’y tila along humahampas— / isiping mararating mo rin, pampang ng ating tahanan.”
Isang mahalagang ambag sa panitikang pambata ng Pilipinas, pinapaalala ng koleksiyong ito ang kahalagahan ng ingklusyon at pagtugon sa mga panlipunang isyung kinakaharap ng iba’t ibang batang Pilipino. Rekomendado para sa mga bata at pusong bata.
Sierra Mae Paraan
Basic Education Advisor
Save the Children
Author: Vijae O. Alquisola
ISBN/ISSN: 978971542987-0
Category: Literary; Poetry; Children's Poetry
Copyright: 2022
Pages: 58pp
Size: 9x11
Type: PB/Glossy