Que é a natureza? Existe a natureza? A natureza é unha construción cultural ou social? Existe algo independentemente de nós ao que nos poidamos referir así, nesta época do Antropoceno? Por outra banda, podemos danar a natureza? Ese dano é algo consubstancial a ela ou é un feito histórico? A todas estas preguntas trata de responder este libro, dende a filosofía e apoiándose noutros campos do saber.

A través das súas páxinas veremos que a natureza segue a ocupar un lugar preeminente nas preocupacións das nosas sociedades contemporáneas, ora como recurso que aproveitar, ora como espazo que habitar. Sexa de esguello ou directamente, como fai o ecoloxismo, as miradas cara á natureza continúan a estar presentes nos nosos discursos e elaboracións teóricas en diferentes eidos. O presente libro fai unha análise orixinal, pertinente e rigorosa sobre o concepto de natureza, a partir da constatación da súa vulnerabilidade, entendida esta como exposición ao dano e como apertura. Unha vulnerabilidade que non se refire á súa esencia, senón aos acontecementos históricos que desembocaron nela.

Hoxe cobra importancia pensar na Terra, cando o despregue do gran capital e a súa globalización económica destrúen e actúan como contrapunto da mesma, solapándoa, ocultándoa e negándoa, tendo como resultado a conseguinte crise ecolóxica na que estamos inseridos. Unha crise que pon o foco na lameira sobre a que se sustentan as nosas sociedades, pasando por alto toda unha ontoloxía de relacións que explica a nosa comunidade de vida.

ÍNDICE
Introdución.
Vulnerabilidade
Natureza vulnerábel
A natureza a través das ciencias da vida.
Historia natural.
Georges Cuvier
O vivo
A natureza e Alexander von Humboldt
Ernst Haeckel e a invención da ecoloxía..
Vernadsky e a biosfera
Natureza, revolución científica e mecanicismo..
Vello organicismo: cosmos e necesidade.
Novo organicismo: caos e azar.
Outras naturezas
A natureza inventada..
Natureza inexistente
Natureza antihumanista..
Natucultura ..
A fin da natureza.
Socionatureza
Natureza morta
Natureza, ergo
Natureza galega.
Natureza e romanticismo
Natureza e capitalismo...
A acumulación primitiva ..
Os cerrados, a propiedade privada e as mercadorías ficticias
Os comunais ...
A mercadoría natureza..
Bibliografia

Alexandre Cendón (Vigo, 1973) medrou baixo as influencias máis contestatarias do mundo punk, radios libres e casas okupas do Vigo dos 80 e 90.

Logo de se formar en Filosofía na USC regresou ás raíces paternas en Covelo para asentarse no territorio como abelleiro, fundando, con outros socios, Abella Lupa (apicultura ecolóxica).

Foi insubmiso ao exército, membro fundador da Asemblea do Suído, coordinador da Federación Ecoloxista Galega e, en consonancia con este compromiso coa Terra, é presidente do monte veciñal de Santiago de Covelo (ICCA) dende 2004.

A acción directa, a loita continuada e o traballo incesante en defensa da natureza non impediron que continuase o seu labor de pensador, formando parte da Aula Castelao dende 2008, entidade organizadora da Semana Galega de Filosofía, onde, a día de hoxe, ocupa o cargo de presidente e tamén, a ser Doutor en Filosofía, acadando o premio extraordinario de doutoramento.

Na actualidade exerce de profesor nun instituto.

_____

Editorial: Laiovento 02-2026
Idioma: Galego
Páxinas: 236
ENSAIO
NATUREZA
MEDIO AMBIENTE